Hrísey og barneignir

Svenni Arnars, Hafnfirðingur með búsetu á Akureyri, var að segja frá því, að hann og félagar hans úr Samfylkingunni á Akureyri hefðu farið til Hríseyjar í dag í mikilvægum erindagjörðum. Það segir ekki beinlínis frá því, en spurning um hvernig skilja má setningar, að hinir kratarnir hafi farið aftur með Sveini í land. Ég er feginn að fá Svenna aftur í land, því þrátt fyrir að vera krati, er þetta ágætis náungi. En mér líst reyndar ágætlega á, að senda sem flesta krata til Hríseyjar. Spurning að gamla einangrunarstöðin í Hrísey verði nú loksins látin gera eitthvað gagn.

Sveinn heldur síðan áfram og segir:

Eftir það lá leiðin heim þar sem haldið var upp á 23ja ára afmæli kærustunnar minnar, sem ber fyrsta barnið okkar undir belti. 

Ég vil hérmeð óska kærustunni (sem mig minnir að ég hafi hitt með Svenna fyrr í haust) til hamingju með daginn og þeim báðum til hamingju með litla barnið.

 

Tvöföldun

Jæja, þá er þetta orðið formlegt. Ég vísaði til þessa í bloggi hér 21. desember. Hamas ætlar að tvöfalda í sveitum sínum.

Þetta er nú allt frekar morkið. Hamas og Fatah deila og skjóta liðar þeirra hverjir á aðra með reglulegu millibili. Síðan kemur Abbas og segir öryggissveitir Hamas ólöglegar. Hamas liðar svara með því, að tilkynna að þeir ætli að tvöfalda fjölda hermanna sinna.

Það er dálítið skondið, í þessu samhengi, að bestu vinir Hamas og félaga, Ögmundur og co í VG Palestína, eru í þeim flokki, sem hefur, ásamt undanförum, gagnrýnt t.d. varnarsveitirnar 30. mars 1949, þegar íslensk stjórnvöld stofnuðu varalið til að verjast ásókn kommúnista. En enginn þeirra hefur, mér vitandi, gagnrýnt það, þótt stjórnarflokkurinn á heimastjórnarsvæðum Palestínumanna sé að reka eigin, vel vopnaðar öryggissveitir, sem jafnvel berjist við hinar formlegu öryggissveitir hins opinbera og taki jafnvel þátt í eldflaugaárásum á nágrannaríki. Getur verið, að það væri friðvænlegra á þessum slóðum án Hamas?

En jæja, aftur að Hamas sveitunum og deilum þeirra við Fatah. Ég fæ ekki betur séð, en að átök þessara tveggja hópa muni fara vaxandi en hitt, þrátt fyrir samninga Abbasar og Hamas-stjórnarinnar um "vopnahlé."

 

 

Hamas-samtökin ætla að tvöfalda fjölda öryggissveitarmanna

Hvernig dettur 15 ára stelpu í hug...

...að fara á rúntinn til Akureyrar, frá Neskaupsstað, án þess að láta vita af sér. Og hvað ætli leitin hafi "kostað"?

Unglingsstúlka kom í leitirnar heil á húfi á Akureyri

*HAFNAÐ*

Arsenal sigrar Liverpool 3-1 á útivelli. Jæja, en Liverpool getur kannski náð fram hefndum gegn b-liði Arsenal í næstu viku.

Engey flutt úr landi?

„Ég harma að þessi staða skuli vera komin upp því ég taldi að þessi eyja væri að gera það best allra á síðasta ári, þess vegna kemur þessi uppákoma mér verulega á óvart,“ segir Guðni Th. Birgisson, minjavörður, um flutning Engeyjar til vinaborgar Reykjavíkur í Hollandi en eyjan mun í apríl nk. verða dregin til gróðursælli staðar við strendur Máritaníu í Afríku, þar sem rísa mun sumarleyfisstaður í eigu Íslendinga.

En svona mun Engey eiga að líta út eftir nokkur ár, á sínum nýju slóðum (mynd tekin frá sumarhúsi borgarstjóra):

Harmar að Engey verði flutt úr landi

Morkinn laugardagur!

Jæja, ekki skemmtilegasti dagur ársins, en lagast snarlega ef Arsenal vinnur Liverpool á eftir.

Þetta er einn af þessum dögum. Vaknaði óvenju seint, eða um sjöleytið, og skrapp í kaffi og síðan á skrifstofuna. Ekki beinlínis vinna þetta skiptið, heldur er ég að reyna að undirbúa mig eitthvað fyrir Praha open 2007, alþjóðlegt skákmót sem ég mun taka þátt í og byrjar þann ellefta.

Eftir hið hræðilega hótel í Serbíu núna í nóvember hlakka ég a.m.k. til að tefla og gista á sómasamlegu hóteli, TOPHOTEL í Prag. Fjögurra stjörnu hótel, 930 herbergi, grunnflöturinn eins og 11-12 fótboltavellir. Að vísu verð ég að láta mér nægja ódýrt ** Carni herbergi, en það dugar vel. Þarna er gym, sundlaug/ar, tennisvellir, nudd, gufa, sauna og allt þetta venjulega á **** hótelum. Mér er sagt, að þetta sé stærsta hótel í Evrópu, og gæti það verið, nú þegar Rossija í Moskvu er komið á haugana. Ég sé eftir því hóteli. Það stóð reyndar á þeim stað, þar sem áður var Delovoi Dvor, bolsévíkahótelið þar sem Hendrik Ottósson og Brynjolfur Bjarnason dvöldu á heimsþingi Kominterns 1920. En á Rossija átti maður góðar stundir 2003 og 2004, bæði skiptin á skákmóti, hvað annað.

Ég kem svosem ágætlega undirbúinn fyrir þetta mót, nema hvað mig skortir á líkamlegt úthald, sem því miður er bráðnauðsynlegt í svona móti, sér í lagi þar sem ég er enn ekki laus við síþreytuna. En það má alltaf gera aðeins betur. Maður fer því í ræktina með, rétt til að koma sér í form. Það er hægara sagt en gert að pína hausinn á sér til að malla af fullum styrk í a.m.k. 15 klst. á dag.

Skrapp reyndar frá rétt eftir hádegið til að hitta litlu börnin hans bróður míns, Munda í Stepp og Veiðikortinu. Þau eru yndisleg. En er nú mættur aftur, og ætla að reyna að rifja upp teoríurnar. Mæti svo galvaskur á Kebabhúsið hér rétt hjá skrifstofunni minni um fimmleytið, en nokkrir skákstrákar hittast þar oft þegar skemmtilegir og spennandi leikir eru sýndir. Að þessu verður það Liverpool-Arsenal. Þar er að duga eða drepast fyrir mína menn, þá síðarnefndu.

Og úti er hætt að snjóa, en morkið yfir að líta, þar sem maður horfir yfir Akrafjall og Skarðsheiði, eins og gráleitar martraðir. Ekkert er eins morkið og dumbungskvöld í Reykjavík.

Svínasúpan!

Ég styð það heilshugar, að það megi ekki dreifa Svínasúpunni frítt. Helst ekki sýna hana heldur. Ég meina, Spaugstofan er orðin þreytt, en Svínasúpan er morkin. Sennilega er ég bara orðin svona gamall og þreyttur, en stundum eru brandararnir þar ekki einu sinni virði

Franskir öfgamenn fá ekki að gefa fátækum svínasúpu

Löður -- "Soap"

 Ég komst yfir seríu 1 af "Löðri" eða Soap, eins og þættir þessu hétu víst upp á engil-saxneska mátann. Ef ég man rétt, þá var þessi þáttaröð upphafið að nýrri tegund sjónvarpsefnis, sem síðan hefur talist ómissandi, svokölluðum "sit-coms", þar sem nánast allt var leyfilegt. Svipaðir þættir höfðu vitaskuld verið sýndir áður, en höfðu einhverra hluta vegna ekki náð sömu útbreiðslu og ekki haft sömu áhrif.

Ég er svosem enginn sérfræðingur í amerísku sjónvarpsefni, enda horfi ég lítið á sjónvarp, einna helst fréttir. En ég hef gaman að þessu gömlu þáttum frá USA, s.s. MASH og nú Löðri. Húmorinn þar er, að mínum dómi, mun þægilegri viðfangs en sá, sem er í þessum nýju þáttum, þ.e. af þeim sem ég hef séð.

Þegar maður var barn og unglingur horfði maður á Löður á nánast hverju laugardagskvöldi. Þetta er skylduáhorf bæði hjá mér og flestum sem ég þekkti á sama aldri. Þættirnir hurfu síðan af dagskrá og aðrir tóku við. En einhvern veginn lifði Löður í minningunni umfram hina.

Þessi sería 1 fæst m.a. á Amazon, og einnig aðrar seríur af Löðri, en myndin að ofan er úr fjórðu seríunni. Hver sería kostar um 20 dollara, en fyrstu fjórar á 68 dollara. Skora ég á menn að rifja nú upp gamlar góðar stundir með fólkinu í Löðri og hlæja hressilega, þó ekki sé nema fyrir það, að horfa á fata- og hártískuna frá þessum tíma.

En persónulega gef ég þessum þáttum 8.5/10.

Vistmenn úr Byrginu á götuna?

Hvað segja menn nú? Eina skjólið, sem fólk þetta hafði, er horfið, eða svo gott sem. Nú þurfa Kompásmenn, heilbrigðis- og lögregluyfirvöld, og aðrir hagsmunaaðilar að taka höndum saman og reyna að hjálpa þessu fólki.

Kannski þeir, sem hér á blogginu hafa talað sem hæst og oftast gegn Byrginu undanfarnar vikur, taki að sér eins og 1-2 fíkla, til að forða þeim frá götunni? Eða kannski Stöð 2 skaffi einhverjum þeirra húsaskjól?

Síðustu árin hef ég vanalega farið á BSÍ í kaffi frekar snemma á morgnana og stundum setið þar einn, meðan borgin sefur. En síðustu viku hefur þar verið tiltölulega margt um manninn. Þar hafa átt í hlut menn, sem ekki eiga sér heimili og koma þarna á morgnana, af því að þetta er eini staðurinn sem er opinn. Og sumir þeirra eru jafnan í slæmu ásigkomulagi, bæði líkamlegu og oftast ölvaðir eða dópaðir. Ég hef nú ekki spurt þá, en það kæmi mér ekki á óvart, þótt sumir þeirra hefðu fyrir rúmri viku síðan dvalið í Byrginu.
 

Vistmenn yfirgefa Byrgið - lögreglan í Reykjavík kveðst kvíða framhaldinu

Börnin þrjú og henging Saddams

Maður hlýtur að spyrja sig þeirrar spurningar fyrst, til hvers í ósköpunum eru sjónvarpsstöðvar að sýna þennan atburð og það á besta tíma? Í öðru lagi, hverig geta börn skipulagt hengingu og framkvæmt hana? Í þriðja lagi, hvað á nú að gera við þennan aula, sem tók henginguna upp í óleyfi og lak á netið?

En um henginguna. Ég las hér einhverns staðar á blogginu í gær mjög merkilega pælingu, þar sem dæmið var sett upp eftirfarandi:

Íslendingar hefja hvalveiðar með þær röksemdir, að burtséð frá þeim áhrifum, sem hvalveiðar hafi á almenningsálit og þær afleiðingar sem þær hafa á vild Íslendinga á alheimsvísu, er þetta einkamál Íslendinga, sjálfstæðrar þjóðar sem hefur ákvörðunarvald í þessu máli, ekki einhverjir kallar úti í heimi. En hvernig geta þá þeir sömu gagnrýnt hengingu Saddams, sem var hengdur af Írökum í samræmi við dóm íraskra dómstóla?

Þetta er í sjálfu sér ágætis pæling og í meginatriðum rétt hugsun að baki. En munurinn er og var, að enginn mun drepa neinn eða sprengja sig og aðra í loft upp vegna hvalveiða Íslendinga, meðan hætta er á slíku vegna hengingar Saddams. Svo ekki sé talað um þá, sem drepa sjálfa sig vegna þessa atburðar.

En annars skil ég ekki, hvernig menn geta hengt sig vegna þessa erkiþrjóts og fjöldamorðingja. Saddam er ekki "æðri málstaður", sem vert er að deyja fyrir.

 

Þrjú börn frömdu sjálfsmorð eftir að þau horfðu á aftöku Saddams í sjónvarpi