Þegar ég var dæmdur fyrir ýmis brot

Já, þetta var snemma á níunda áratugnum. Það kom eitthvað yfir mig og ég framdi fjölda brota á mjög skömmum tíma, allt á sama klukkutímanum.

Svo fór því að lokum, að dómarinn dæmdi mig til að hljóta gula spjaldið, enda hefði ég framið nokkur brot áður og tveggja fóta tækling væri óæskileg.

Afsökun mín, að þarna væri um að ræða KRing, sem ætti ekki skilda neina silkihanska, var ekki tekin til greina.

Dæmdir í fangelsi fyrir peningafölsun og fleiri brot

Capello tekur við K.R.

Samkvæmt óöruggum heimildum hefur Fabio Capello, brottrekinn þjálfari Real Madrid, verið ráðinn þjálfari KR út keppnistímabilið. Talið er, að hann muni í kjölfarið þar á gerast yfirmaður knattspyrnumála hjá West Ham United og bankaráðsmaður í Landsbankanum, f.h. Samsons.

Samkvæmt frétt El Toroshitto mun Capello hafa lýst því yfir við nána vini, að meðfylgjandi sé kaupréttarsamningar á hlutabréfum í Landsbankanum og einhverju símafyrirtæki í A-Evrópu.

Capello rekinn frá Real Madrid

Kolvetnajöfnun

Jæja, ég er búinn að kolvetnajafna fyrir daginn. Borðaði smá brauðmeti í morgun, og fór svo og kolvetnajafnaði með því að taka ágætlega á í ræktinni. Skilaði ég þar með kolvetnunum aftur út í náttúruna í beinu framhaldi, þegar ég kom heim.

Manni líður strax betur!

Veðrið

Jæja, maður hefur séð það verra í lok júní. En hvenær ætli komi almennilegt sumar, með yfir 20 stiga hita dag eftir dag, og jafnvel logn hluta af degi?

Átti ekki mengunin og gróðurhúsaáhrifadæmið að auka hitann hjá okkur?

Veðurhorfur næsta sólarhringinn

Hætta í íbúðahverfi

Jæja, þá er verið að flytja úr Grænuhlíðinni, af næstum því horninu á Stigahlíð. Þetta er góður staður að búa á, eða hefur verið. En nú er best að forða sér, áður en fasteignaverðið þarna í hverfinu fellur enn frekar.

Ástæðan er einföld. Löggilt Liverpool-verslun hefur verið í Suðurveri nú í nokkurn tíma og frá þeim tíma hefur fasteignaverð hrapað.

Ég meina, hvernig stendur á því að borgin leyfir svona starfsemi að vera í íbúðahverfi? Hvað með börnin í hverfinu? Þau er í stórhættu að smitast af rauðu Liverpool-pestinni og stórskemma framtíðarmöguleika sína í lífinu. Af hverju var ekki haldin grenndarkynning, áður en starfsemi þessi fékk heimild til að setja sig þarna niður?

En það er vísast orðið of seint núna, svo ég sé mér ekki annað fært en að flytja, áður en hverfið verður algjörlega ofurselt veirunni!

Og til að vera alveg viss um allt smit, þá færi ég mig fjær KR heimilinu og nær hinum nýju höfuðstöðvum FRAM þarna uppi í sveit.

Gagnkynhneigð belja

Samkvæmt óöruggum heimildum er þetta sama beljan og kyssti Guðna. Greinilegt er, eins og allar líkur benda til, að hún hafi haldið, að stúlka þessi hafi líka viljað kyssa Guðna og því ráðast á hana, til að hrekja keppinautinn frá.

Og þegar hún sneri aftur frá árásarferðinni, var Guðni farinn. Síðan hefur veslings beljan verið í ástarsorg og ekki að undra, enda telja 72% kúa skv. síðustu skoðanakönnun Capacents, að Guðni Ágústsson sé kyssilegastur mannfólksins.

En síðan er auðvitað spurning, hvort Guðni hafi gengið lengra og tekið í spenana á beljunni frægu?

Slasaðist í viðskiptum við kú

Vel valið!

Af krata að vera, er Hrannar Björn Arnarsson mjög fínn! Reyndar er hann að mínum dómi jafnvel í sama gæðaflokki og eðal sjálfstæðismenn.

Eg hef þekkt Hrannar lengi og hef engan efa um að hann eigi eftir að standa sig afburða vel sem aðstoðarmaður Jóhönnu Sigurðardóttur í félagsmálaráðuneytinu.

Þarna valdi Jóhanna rétt.

Hrannar Björn aðstoðarmaður Jóhönnu

Það er gott að spila í Kópavogi

Gaman er, að Kópavogur skuli nú eiga tvö ágætis lið í efstu deild í fótbolta, en hin síðustu misseri hafa bæjarbúar í Goldfingerbæ jafnan mátt sætta sig við neðri deildar bolta.

En greinilega er stóri bróðir betri, því Blikar sigruðu 3-0. Á sama tíma sigraði ÍA lið Víkings með sömu markatölu. Greinilegt að úthverfi Reykjavíkur eru orðin gróðrarstía ágætis fótboltamanna (eins og svo oft áður).

En nú er komið að leik Vals og FH. Ég mun að sjálfsögðu halda með Val, bæði til að koma spennu í mótið og líka hitt, að mér er ómögulegt að halda með liði, sem spilar í Spurs-búningi! Síðan má bæta við, að ég hef ekkert gaman að fimleikum og því síður fimleikafélögum.

Og síðan er stórleikurinn KR-FRAM annað kvöld. Sigri þeir bláu, verða KRingar komnir með annan fálmarann í fallöxina, en allt verður opið áfram, nái þeir litlausu að stela punkti. Sigri KRingar munu FRAMarar vísast falla niður um deild, því það gæti orðið mjög mikið áfall, sálfræðilega, að ná ekki að vinna skyldupunktinn, svona svipað og þegar ég tefli við Björn Þorfinnsson, nema hvað Björn er með skemmtilegustu skákmönnum landsins og teflir djarft til sigurs, meðan KRingar spila leiðinlegan kick and run fótbolta, svona svipað og Burnley spilaði um 1975.

Áfram FRAM!

Breiðablik - HK 3:0

Cruise settur í bann í Þýskalandi

OK, í prinsippi er þetta algjör della. Hvers vegna á að banna fólk vegna trúarbragða þess. Og þá gildir einu hvort í hlut eiga Þýskaland eða Saudi Arabía, t.d.

En hinn bóginn sagði stofnandi Vísindakirkjunnar, að besta leiðin til að verða ríkið, væri að stofna trúfélag. Það gerði hann. Persónulega er ég ekki hrifinn af þessu félagi.

EN ég er þó hlynntur þessu banni Þjóðverja, því mín skoðun er, að Tom Cruise ætti að banna frá sem flestum löndum....ekki vegna trúar hans, heldur af því að hann er orðinn gjörsamlega óþolandi strákanginn.

 

Þjóðverjar banna Cruise

Normal eða öfgamenn?

Endilega tökum upp stjórnmálasamband við Her íslams. Þetta eru svo sómakærir og friðelskandi menn þarna á Gasa.

En af hverju eru þessir mannræningjar kallaðir "öfgamenn", þeir virðast bara normal miðað við t.d. Fatah og Hamas, og slíkir friðarsinnar eru helst ekki kallaðir öfgamenn, amk ekki á Íslandi.

Ítreka dauðahótun gegn breskum blaðamanni