Réttur dagsins

Þari með villisveppasósu, frönskum og diet Sprite. 1.990.-

Fæst einnig undir nafninu: McWeed á næsta McDonalds stað.

 

En spurning hvort ekki væri hægt að selja hingað sérstakar afsláttarferðir fyrir Skota: Fá að tjalda í fjörunni og borða eins mikinn þara og þeir geta týnt.

En talandi um Skota. Merkilegt samtal hérna í gær hjá Skotunum tveimur.

Skoti 1: Hehe, ég hljóp heim á hótelið af skákstað, beint á eftir rútunni, og sparaði mér 3 evrur.

Skoti 2: Slakur ertu, ég hljóp heim á eftir leigubílnum og sparaði mér 18 evrur.

Þara landað í fyrsta sinn á Bíldudal

Góðir félagar

"Þrír aðstoðarmenn fylgja honum yfir sundið í bát, þeir Ingþór Bjarnason sálfræðingur, Stefán Karl Sævarsson verkfræðingur og Heimir Örn Sveinsson tölvunarfræðingur."

Mér finnst þetta svolítið skondið. Hér er greinilega um vini kappans að ræða, en ég fatta ekki hvers vegna starfsheiti þeirra koma málinu við.

Svipað eins og ef ég ætlaði að heyja maraþonskákir a la Krummi, og mér til aðstoðar væru fjórir verslunarmenn og fimm ruslakallar. Það væri annað, ef til aðstoðar væru læknir, hjúkka og næringarfræðingur.

En jæja, breytir svosem engu. Þarna eru á ferðinni góðir félagar, greinilega. Og traustir vinir geta gert kraftaverk.

Reynir að synda yfir Ermarsund

Morkinn morgunn í Lúx

Ég ætla að byrja á því að segja það sem ég hef gleymt undanfarið. Leiðin til Differdange.

Og þessi er sérstaklega tileinkum Jóhanni Hirti og öðrum "bæernissinnuðum" Garðbæingum, en við ökum á skákstað förum við framhjá þorpi, sem heitir næstum því Garðabær og reyndar fór svo að Rúnar Berg las "Garðabær" á skiltinu og hefur sá bær verið kallaður svo síðan. En það þarf ekki að taka fram, að við ökum beint framhjá. Þar er ekkert að sjá, eins og í vinabænum heima á Íslandi.

Og meira af nöfnum. Á skilti við bæjarmörk Bascherage stendur nafn bæjarins, þetta franska, en síðan orð, sem mér skilst að sé hið þýska nafn hans. En það er BIFF, sem er gælunafn á vel kunnum íslenskum skákmanni. Og rétt hjá hótelinu er stórt skilti: "Biff Car Wash". Jæja, svo Helgi er kominn í bílaþvottinn??

En jæja, Dagurinn í gær!

Ég vaknaði á sama tíma og venjulega hér, eða um sjöleytið og tölti niður í morgunmat. Aldrei þessu vant gat ég borðað eitthvað og var það góðs viti. Greinilega höfðu tvær máltíðir af hráu nautakjöti tekið sinn toll, en orðið að lúta í lægra haldi fyrir Svíanum að lokum. Robbi og Rúnar fóru í gönguferðir út í sveit. Robbi er búnað að kenna Rúnari þetta, en hann féll fyrir þessu göngusystemi þegar við vorum í Serbíu í fyrrahaust, en sjálfur varð ég hooked af þessu, þegar ég var á móti með Ágústi Sindra 2002, en sjálfur hefur hann vísast lært þetta af Margeiri, MP-bankamanni.

Síðan reyndi ég að stúdera aðeins fyrir IM Michiels, og gekk það svosem vel, meðan maður fékk frið fyrir msn-istum og öðrum truflunum (sem eru vissulega kærkomnar í hófi!). Síðan tóku við 2 klst stúderingar með Hjörra og síðan meiri stúderingar. Síðan um kl. 16 var ég sóttur. Við ætluðum í mat niðrí Differdange. Af einhverjum ástæðum loka helstu matsölustaðir hér í bæ kl 14.00 og opna aftur kl. 18.00. Þetta system hentar okkur frekar illa.

En við föttuðum ekki annað. Í fyrsta lagi er omögulegt að fá bílastæði og í öðru lagi voru næstum allir matsölustaðir í 20.000 manna bænum Differdange lokaðir á mánudögum. Þetta er semsagt dagurinn sem Lúxarar fasta eða elda sjálfir.

Við fundum loksins pizzastað sem var opinn. Þar pantaði ég mér "bara eitthvað", og fékk síðan pizzu með bacon og spæleggi! Svoleiðis hef ég aldrei séð áður og hef þó unnið á pizzastað. Þar var einn annar gestur, sem leit út eins og Mr. Bean, gekk eins og hann var jafn undarlegur í háttum og sá enski. Þetta var svoldið skondið.

En ég var svosem ekki svangur, frekar en venjulega, en ég varð að pína þetta ofaní mig. Hafði ekkert borðað nema súpu 1x síðan á föstudag og var orðinn frekar sloj. En þetta tókst. Um leið lagaðist hausverkurinn aðeins -- ég fatta ekki hvers vegna svoleiðis heimsóknir koma oftar á mig þegar ég er erlendis en heima.

Við mættum bræðrunum HS eldri og HS yngri á skákstað. Við ræðum jafnan aðeins við Hannes fyrir og eftir skákir, en hittum hann annars lítið. En af Héðni höfum við engar spurnir. Hann bara er þarna og hefur engin samskipti við okkur hina -  gjóir kannski augunum til okkar þegar við mætumst á leið til eða frá Svíanum. Og síðan er hann bara horfinn, þegar skák er lokið, áður en einhver okkar getur þó ekki sé nema kastað á hann kveðju.

Þeir HSarnir búa á Threeland ****, í næsta þorpi við okkur hina. En mér skilst þó, að það hótel sé ekkert betra en Hotel Carpini okkar, í þægindum talið. Ég skoðaði herbergin þar á netinu og sýnist mér mitt herbergi vera stærra en þeirra og búið amk sömu þægindum. Og síðan er frábær restaurant á okkar hóteli. En þeirra herbergi kosta helmingi meira (en þeir fá vísast heldrimannaafslátt). (Já, gleymdi; það stóð á pöntunarsíðunni, að það væri internet á hótelum Hannesar/ Héðins og Róberts /Rúnars, en ekki okkar. En síðan kom í ljós, að netið þar er selt dýrum dómum, en hins vegar er gott net hjá okkur, og ókeypis, og er inni á herbergjunum!!! Snilld!)

 

En jæja, skákirnar gengu jafnan vel hjá okkur Mörlandanum eins og sagði frá í gærkvöldi. Og ekki var pörunin upplífgandi: Robbi og Hjörri tefla saman og ég fæ Kasparov í hefndarhug gegn Íslendingum.

En staðan hjá okkur Íslendingunum er, að Héðinn, Hannes og ég erum í 4.-21. sæti með 3/4, Robbi og Hjörri hafa 2/4, Rúnar Berg 1.5/4.

Veðrið passaði líka. Þegar heitt er heima á Íslandi er tiltölulega kalt hér í Lúx (og í Prag, skv. Hannesi). Hér var þá semsagt frekar kalt í gær og aftur í dag.

4. umferð í Lúx - gamalt bros tekur sig upp

Jæja, þetta er allt að koma.

Samt var þetta morkinn dagur. Ég sá fram á algjöra þjáningu, því andstæðingur minn er þrælsterkur alþjóðameistari frá Belgíu, Bart Michiels, ungur strákur c.a. 18 ára. Hann er mjög efnilegur og er á hraðri uppleið.

Það versta við hann var, að hann hefur alveg ótrúlega gott vit á skákbyrjunum, einkum með svart. Ergo, hann teflir mínar byrjanir og það nanast nákvæmlega, jafnvel í undirvaríöntum. Nú veit ég hvar lappinn minn, sem var stolið, hefur endað!

Og fátt þykir mér erfiðara en að tefla gegn eigin byrjunum. En þegar á hólminn var komið ákvað ég að verða fyrri til að koma á óvart, ef færi gæfist. Upphafsleikirnir voru 1.d4-d5 2.c4-dxc4! 3.e4. Ég er með hvítt. Þessu hef ég aldrei leikið áður og kann voðalega lítið í þessu. Hann leikur jafnan 3...Rc6, sama og ég, að sjálfsögðu, en hann óttaðist að ég kynni þetta betur en hann (vísast rétt, enda hafði ég undirbúið glaðning handa honum), svo hann svaraði með 3...c5. Úff, þetta kunni ég ekki nógu vel og hafði ekki mátt vera að því að stúdera nóg, því ég þurfti einnig að stúdera 1.d4-e6 2.e4, McCutcheon afbrigðið. Nokkur tími fór reyndar í það. 3...c5 í Mótteknu drottningarbragði var bara einn af mörgum möguleikum.

Ég var því ekki alltof bjartsýnn, þegar á upphafsleikina leið, ekki síst þar sem hann valdi hvassasta afbrigðið. En ég tefldi besta framhaldið og þegar honum urðu á smá ónákvæmni (í stöðu sem var mjög slæm hvort sem var) fór ég all in. Fórnaði manni á hann og réðst á hann. Það er skemmst frá því að segja, að ég fann alltaf bestu leikina, nema í lokin, þegar ég tók þann næstbesta, en þá var staðan hvort sem er gjörunnin. En í stuttu máli, ég held að þetta sé besta skák sem ég hef teflt síðan 1990, þegar ég slátraði Pólverjanum, sem var þá í polska ólympíuliðinu og hann kærði mig fyrir að vera of góðan fyrir elóstigin mín, því ég hefði, að hans sögn, komið með þrusu endurbót á taflmennsku sjálfs Garrýs Kasparov. Ég þurfti því að sýna vegabréf til að sanna hver ég væri.

En a.m.k. besta skák mín held ég síðan þá. Brosið er aftur komið á andlitið. Og það besta var, að ég reiknaði og mat rétt þær leiðir, sem ég hafnaði og hverju ég átti að leika, hefði hann leikið öðru. Ég var ánægðastur með að sjá van Wely þemað Bxc4 þarna á einum stað. Þetta hefði ég aldrei fattað nema af því að Lókurinn (Loek van Wely) hafði leikið þessu í svipaðri stöðu.

Hjörvar fékk aðeins betra, en reyndi of mikið að vinna, og missti þetta niður í jafntefli. En hann sýndi ótrúlega seiglu strákurinn og sveið WGM Wagener 2292 og hafði greinilega gaman af að kreista hana í endataflinu.

Robbi var óheppinn að tapa gegn sterkum andstæðingi, GM held ég. Hann var með mun betra, en lék þessu niður. Agaleg óheppni þetta.

Héðinn gerði held ég jafntefli. Hann gat amk tekið þráskák í stöðu, sem bauð ekki upp á neitt annað.

Hannes vann frekar auðveldlega og Rúnar Berg fékk á sig margskonar fórnir gegn Pésa Biskup, en þræddi bestu leiðina og skilaði sér í mark með heilan vinning.

4.5-1.5 og við vorum að tefla vel uppfyrir okkur á 4 borðum af sex.

Morgunn í Lúx

Jæja morgunn í Lúx. Hér til hliðar er mynd af manninum með Pocket-Fritzinn þessi í gula bolnum. Fritzinn er síðan í vasanum, beint fyrir aftan höfuð drengsins, sem er að tefla við náungann, sem tapaði með Vodafone gambít gegn mér í gærmorgun.

Menn hér eru almennt þreyttir eftir gærdaginn. Það er nógu erfitt að tefla tvær skákir á dag, en hitinn bætti ekki úr skák. Maður sá t.d. að Róbert var gjörsamlega örmagna þarna í gærkvöldi.

Ég vann þennan náunga, sem sigraði IM Fred Berend í 1. umferð. Hann tefldi ágætlega. Hins vegar hef ég greinilega vanmetið stöðuna hjá mér úr byrjuninni. Ég hélt ég væri með stöðulega tapað, en þegar ég skoðaði skákina í Rybku tölvuheilanum kom í ljós, að svo var ekki. Ég kom meira að segja með merkilega nýjung (óvart!), sem Rybka var mjög hrifin af.  En frá þeim tíma, þegar ég hélt ég væri með stöðulega tapað, fann ég besta leikinn í stöðunni í 9 leikjum af 10, og næstbesta í hinum, en þar munaði aðeins litlu á mati leikjanna. Og jafnframt kom í ljós, að leikir, sem ég var að gæla við, en taldi of varasama, voru í raun lélegir. Þannig að ég er í raun ánægður, nema hvað ég missti af taktísku trikki síðar í skákinni, sá hann einkum leik síðar, en þá var ég leik á undan miðað við hitt afbrigðið. Þar missti andstæðingur minn af tækifæri til að þvinga fram jafntefli.

Nú myndir frá 3. umferð eru komnar á netið. Þar eést í Hjörvar og Hannes einu sinni, en ekki í hina Íslendingana. Hins vegar eru fjórar eða fimm myndir af Fionu. Greinilegt að karlmaður var að taka myndirnar í gær, eða einhver vinkonan!

Nú, þegar RB var að klára skákina byrjaði að rigna. Við komumst óhultir heim og settust við borð á stéttinni fyrir utan besta pizzeria í "rural Lux", en svo vill til, að sá staður er í kjallara hótelsins okkar og er í eigu sömu aðila. Við vorum semsagt í skjóli undir stóru skyggni.

En skyndilega jókst rigningin og hef ég aldrei séð annað eins úrhelli. Svo fór, að skyggnið fór að gefa eftir og höfðu pollar myndast þar ofan á. Þjónarnir, stundum með hjálp þeirra Grafarvogsfeðga eða Rúnars, hristu úr þessu niðrá stéttina, en þá skvettist jafnan hressilega. Ég fékk smá gusur fyrst og færði mig þá fjær, en Grétar varð verst úti í þessu og var orðinn frekar rakur. Þá meina ég útvortis. 

Og nú er hér skítaveður. Kannski ekki beinlínis kalt, heldur vel skýjað og ekki sólarglampi á lofti. Jæja, best að spila aftur Húsið og ég og athuga, hvort það kalli fram sólina á ný. Annars er þetta veður miklu betra til skákiðkunar, því stundum verður svoldið heitt og mollukennt í sal, þar sem yfir hundrað manns sitja við skákiðkun, jafnvel þó loftræstikerfið þar sé með besta móti.

Nú, jæja, mér sýnist mallakúturinn minn hafa jafnað sig eftir hráa nautakjötið fyrsta kvöldið. Ég gat amk borðað morgunmat í morgun og er þetta fyrsta sem ég kem niður (og held niðri) síðan á föstudag, ef undan er skilin súpan á laugardagshádegi og 1-2 jógúrt.

Vonandi verður maður þá orkumeiri í dag, en síðustu daga. Áfram Ísland.

Jæja, nú kemst Þorfinnur í sturtu

En jæja, heita vatnið var ekki í gangi hjá Þorfinni frá Löngumýri lengi vel í gær. En ég vil nota tækifærið og óska Þorfinnsfamilíunni til hamingju með brúðkaupið á laugardaginn.

Og síðan óska ég að sjálfsögðu Braga (a.k.a. Bragat) til hamingju með daginn.

Heitt vatn komið á í Fossvoginum

3.umferð

Jæja, fyrst uppfærsla frá 2. umferð. Hannesi varð það á, að rugla saman tímamörkum í a- og b-flokki, og hélt því að hann fengi viðbótartíma eftir 40 leiki. En svo gilti aðeins um b-flokkinn. Agalegt að lenda í svona. Hann féll semsagt á tíma.

Update frá Robba. Kasparov sýndi af sér dónaskap, þegar RObbi vann hann í morgun. Hann rauk frá borðinu, tók ekki í hendina á Robba, raðaði ekki upp og hreytti einhverju út úr sér. Fífl. Þessi maður fær greinilega aldrei boð á mót á´Islandi. Annars var þetta snilld. Eins og menn vita hafði Robbi nú samræmt skáknafn sitt og löglegt nafn, en hann, sem hefur teflt undir Róbert Harðarson frá upphafi, heitir í raun Róbert Lagerman og teflir undir því núna. Og þegar Kasparov ætlaði að stúdera fyrir Robba, fann hann engan Lagerman í beisnum, nema nýlegar skákir og var ekki mjög pleased.

Nú, það verður að segjast að Íslendingar voru fjarri sínu besta í dag og flestir hálf meðvitundarlausir, þe í þriðju umferðinni. Héðinn var með hartnær unnið, að okkur fannst amk, en skákin endaði með jafntefli.

Rúnar Berg gerði jafntefli við Pocket Fritz, en vinur andstæðings hans stóð nær allan tímann yfir skákinni. RB fannst þetta óþægilegt, ekki síst þar sem þeir fóru síðan saman út og afsíðis, eins og þeir væru að ræða skákina. Hann kvartaði við skákstjóra. Þegar ég skrapp út að fá mér ferskt loft úr mollukennda salnum sá ég vininn vera með Pocket Fritz (eða svipað apparat) að leika sér og fór síðan beint inn að tala við vin sinn. Ég kvartaði við skákstjóra og það tvisvar. En ég held að þeir hafi ekkert gert. Algjör muppet. En greinilegt er, að náungi þessi tefldi mun verr þegar ég laumaðist á eftir þeim út og stóð rétt hjá og þóttist vera að horfa út í loftið. En niðurstaðan jafntefli. En vonandi munu skákstjórarnir góma kauða redhanded, þó ekki sé nema síðar.

Annars tefldi RB þetta ágætlega.

Nú, við hinir vorum allir meðvitundarlausir í byrjunni. Robbi og Hannes sögðust báðir vera gjörsamlega meðvitundarlausir, eftir erfiðar skákir fyrr um morguninn. Hannes vann samt, enda mótherjinn ekki sérlega sterkur, sagði hann, þrátt fyrir að tefla illa. EN Robbi tapaði.

Hjörvar var juðaður út af borðinu, eins og í 1. umferð. Þreytandi Hunsbragð, sem hvítur laumaði á strákinn, sem varðist þó ágætlega.

Ég hafði verið búinn snemma, en eytt mestum frítímanum í einvígi við Svíann og mætti á skákstað með bullandi hita og gjörsamlega lost eftir að hafa ekki getað borðað neitt nema eina súpuskál og eina jógúrt sl. 2 daga. Enda var ég gjörsamlega týndur fyrstu leikina, enda lak af mér svitinn og þurfti að þurrka af borðinu! Ég laumaðist síðan fram, þegar ég var kominn með hartnær tapað eftir innan við 10 leiki (held ég) og laumaði í mig einni parkódín forte. Smám saman lagaðist ég í hausnum og líkaminn stabíliseraðist. Jafnframt náði ég að finna bestu leikina, held ég, í mjög erfiðri vörn og rétta úr kútnum, þrátt fyrir að þessi gaukur hefði teflt mjög vel og jafnan fundið þá leiki, sem ég vildi síst fá á mig.

En síðan þegar ég hafði stöðvað sóknina réðst á hann og skildi kónginn minn eftir á miðborðinu á berangri með tvo hróka og drottningu við það að fara all in á hann. En með snyrtilegri "Hróksfórn" náði ég að skáka hann til og vinna síðan hrókinn til baka. Hann gafst þá upp, enda með koltapað endatafl. Sá var fúll.

Jæja, 3-3 í dag. Jæja, gat verið verra, en hefði átt að vera betra.

Og fyrir ónefnda íslenska skákáhugamenn, set ég með mynd af Fionu.

Robbi vann Kasparov

þ.e. hinn sterka alþjóðlega meistara (held ég), Sergei Kasparov, og það með svörtu. Héðinn vann auðveldlega, býst ég við eftir byrjunina, Hjörvar vann (vísast auðveldlega líka), ég vann með Vodafone gambítnum, en Hannes og Rúnar Berg töpuðu.

Ergo: 4-2 fyrir Ísland í dag.

Röðun er komin, sjá hér.  Ég fæ local gaur, sem vann alþjóðlega meistarann Fred Berend í fyrstu umferð með hvítu. Og já, ég fæ svart. Nú þarf að bretta upp ermarnar!

Ótrúleg steypa

Sko:

1. Hello borgar 2 millur dollara fyrir myndir frá brúðkaupi. Það segir meira til um lesendahópinn en brúðhjónin, sem fá þarna "easy money" og spara sér rándýran hirðljósmyndara.

2. Það segir líka margt um fólk, að stór hópur skuli safnast saman til að sjá ókunnugt fólk gifta sig, bara af því að hér er um frægt fólk að ræða.

Erum við ekki bara föst í einhverjum sýndarveruleika, þar sem heilbrigð lífsgildi eru á undanhaldi og svona cyperdæmi er tekið við? Allt sem er raunverulegt er hulið, en þeir sem flestu stjórna á bak við tjöldin vilja sýna fólki sýndarveruleika, sem er settur í hásætið og innhaldsleysið vegsamað.

En ef við viljum lifa í Séð og heyrt heimi, held ég að það sé okkar vandamál, ekki blaðsins sem uppfyllir slíkar gerviþarfir fólks.

Longoria hunsaði aðdáendur sína á brúðkaupsdaginn

Sigur í boði Vodafone

Jæja, morgunumferð í Kaupþingmótinu í Lúx. Ég prófaði nýja og ekki svo mjög góða hugmynd gegn Þjóðverja, sem býr hérna á sama hóteli (og sama gangi) og ég. Strákur, sem greinilega er betri en stigin segja til um.

En það reyndi ekki á hana, því þegar ég var að teygja mig eftir c-peðinu, sem ætlaði áfram um tvo reiti í 10. leik, hringdi GSM sími hans og skv. reglum FIDE og mótsins tapaði hann þá skákinni. Þetta var semsagt hinn frægi VODAFONE gambítur. Leiðinlegt að vinna svona, en ég var feginn. Ég var of þreyttur og fúll eftir skákina í gær til að meika þetta núna og var frekar áhugalaus.

Hjörri (a.k.a.Humpy) var kominn upp með sömu stöðu og í gær, en með skiptum litum. Ég efa ekki að hann á eftir að kreista Adrian Hærri (Haerri) sannfærandi.

Robbi var með Robbastöðu, RB fékk á sig Shabalov árásina gegn sterkum IM, sem tapaði óvænt í gær. Héðinn fékk á sig einhvern gambít, en ég efa ekki að hann á eftir að rúlla mótherja sínum upp, enda miklu betri skákmaður. Hannes fékk gamlan kunninga frá EM og hefur svart. Þeir gerðu þá jafntefli, en strákurinn var þá nærri GM áfanga og er, skv. Hannesi, nokkuð góður.

En jæja, nú fær maður smá auka hvíld og get vonandi mætt ferskari í eftirmiðdagssumferðina en þessa. Og dinner með hinni fögru Fionu fyrir skákina hlýtur að hjálpa eitthvað. En áður en menn fara að hugsa eitthvað misjafnt, þá bauð íslenska liðið hér henni í mat, en hún hefur verið okkur afar hjálpleg og verður það vísast áfram. (Á neðri myndinni er Stefanova næst, en þessi með furðuhárið sigraði Hjörra í 1. umferð. Takið eftir hárgreiðslunni, ef svo skuli kalla. Við strákarnir höfðu svoldið gaman að þessu í Fugen í fyrrahaust, en þetta er ekki fyndið lengur!)