Hetjan?

Jæja, ágætt hjá honum að hafa snúist gegn Hitler 1942 þegar hann frétti að 5 sígaunar hefðu verið skotnir fyrir það eitt að vera sígaunar.

Þá höfðu nú hundruðir þúsunda Gyðinga verið myrtar fyrir það eitt að vera Gyðingar,´hundruðir þúsunda stríðsfanga og óbreyttir borgarar af slavneskum ættum teknir af lífi í hrönnum. En það skipti greinilega minna máli, en maður í hans stöðu átti að vera fullkunnugt um hvað væri í gangi, eða amk hluta af heildarpakkanum. Ég fatta því ekki þetta með 5 sígauna?

Nei, þetta er ekki Villi postdoc að skrifa undir dulnefni. Ég er að skrifa þetta sjálfur.

Sá síðasti úr hópnum er reyndi að myrða Hitler

Athugasemdir

[Snorri Bergz, 2.5.2008 kl. 18:03]

Neinei, ekkert skrímsli. Heldur finnst manni þessi röksemd bara furðuleg.

[Hallgrimur Viðar Arnarson (IP-tala skráð) 2.5.2008 kl. 19:00]

Blessaður Snorri,

til þess að skilja hvað meint er með þessu þá er vert að nefna að þjóðarmorðin í seinni heimstyrjöldinni síðari, framin af nasistum, voru mjög vel falin. Þó svo að sumir hópar hafa verið með vitneskju eða tengdir þeim þá var megin parturinn af borgurum sem gerði sér ekki grein fyrir hvað væri að gerast eða voru í bullandi afneitun.

Amma eiginkonu minnar var fædd 1924 og átti ekki heima í stórborg. Útvarp var lúxus og þeir sem áttu það máttu aðeins hlusta á Þýska Ríkisútvarpið sem sendi einungis út heilaþvott um hina miklu sigra allt að stríðsenda. Hún frétti fyrst af hryllingnum eftir stríðslok. Eru margar þannig sögur sem ég heyrði frá mörgum eldri þjóðverja þegar ég bjó úti. 

samkvæmt því sem ég hef lesið mig um, þá var fyrstu kynnin Philipp von Boeselager að hinum raunverulega nasismanum drápin á sígaununum 5. Þegar Philipp von Boeselager gerði sér grein fyrir því að allur heilaþvotturinn sem hann hafði upplifað frá árinu 1933 væri ekki raunveruleikinn þá grennslaðist hann fyrir um og fann út hvaða hryllingur átti sér stað.

Hann var einn af þeim fáum sem þorðu að standa upp og reyndu að enda brjálæðið, því allt of margir lokuðu augunum fyrir hryllingnum og gerðu ekki neitt.

Svo að ég lít frekar á að fréttin sé illa skrifuð og ekki er fjallað um allar staðreyndir. Kveikjan á því að hann snerist gegn sinni stjórn og ástæðan fyrir því að hann komst að sannleikanum voru morðin á sígaununum. 

[Snorri Bergz, 2.5.2008 kl. 19:10]

Ok, ég er ekki að efa heilindi mannsins, þannig séð. Ég skil bara ekki þetta með 5 sígauna, eða skildi ekki. En rétt er, að Moggafréttirnar á netinu eru oft furðulega skrifaðar.

EN hins vegar var þessi maður ekki bara "einhver úti í borg". Hann var á vígstöðvunum og hefði vísast átt að sjá að ekki var allt með felldu. En kannski var hann einn þeirra sem misstu af morðunum í austri. Hver veit. Og vonum það.

http://en.wikipedia.org/wiki/Philipp_von_Boeselager

[Nafni, 2.5.2008 kl. 20:33]

Þetta er rétt sem kemur fram hér hjá Bergz.  Á árunum 1939 er Þjóðverjar réðust inn í Pólland og 1941 er Þjóðverjar réðust inn í Sovétríkin höfðu SS-sveitirnar myrt fólk í hundraðaþúsundatali með aðstoð hins almenna hers.  Í árslok 1941 er þeir komu að Moskvu var talan komin í um hálfa milljón, að mér skilst.  Það að halda því fram að hermaður í hárri stöðu í landhernum hafi ekkert af þessu vitað og síðan fengið sjokk er 5 sígaunar voru myrtir er náttúrulega bull.  Það er hinsvegar rétt að þessi andstaða sem þarna komst á fót í Sovétríkjunum 1941 í hinum almenna her og endaði með tilræðinu við Hitler 1944 hafi átt rætur sínar í viðbjóði samsærismannanna á því að verða vitni að þessum fjöldamorðum nasistanna og áhyggjum þeirra af orðspori þýsku þjóðarinnar á eftir.  Á Von Boeselager vissulega viðurkenningu skilið fyrir að hafa tekið lífshættulega afstöðu með þessum hætti gegn Hitler.

Það hefði ekki verið óheppilegt ef Von Stauffenberg hefði nú notað allt sprengiefnið sem hann fékk hjá Von Boeselager, en ekki bara helminginn.  Var það ekki þannig að hann, einhentur maðurinn, náði ekki að pakka því niður sem skyldi er hann var kallaður til Hitlers og sleppti því helmningnum.  Það varð Hitler til lífs og Von Stauffenberg og félögum hans til ólífis.

[Snorri Bergz, 2.5.2008 kl. 20:41]

Já, auðvitað. Ég á hundruðir bóka um WW II og hef fylgst vel með. Á líka heilmikið af frumheimildum frá þessum tíma, en þær ljósritaði ég forðum erlendis, þar sem ég var um hríð gestifræðimaður. Ég hef nú ekki nennt að leita að þessum manni en ég get fullyrt með 90% vissu að hann vissi af því sem gerðist í austri, vissi að tug- ef ekki hundruðum þúsunda hafði verið slatrað af kynþáttaforsendum. En það var auðvelt að segja bara: "já, þetta eru kommúnistar, kommissarar, Júðar, Slavar".

Því kemur þetta með sígauna á óvart, og það bara fimm, þar eð þeir voru amk ekki mikils metnir í kynþáttastiga nasistanna.