Vefjagigt.is

Ég vil minna á vefinn www.vefjagigt.is, sem nýlega er kominn í loftið. Við, sem höfum lengi þjáðst af þessum sjúkdómi, fögnum því, að loksins séu helstu upplýsingar um þetta mál komnar á vefinn.

Þar er einkennum vefjagigtar m.a. líst eftirfarandi:

Vefjagigt er langvinnur sjúkdómur eða heilkenni sem samanstendur af fjölmörgum einkennum frá hinum ýmsum líffærakerfum. Helstu einkennin eru langvinnir og útbreiddir verkir frá stoðkerfi, almennur stirðleiki, yfirþyrmandi þreyta og svefntruflanir. Önnur algeng einkenni eru órólegur ristill, ofurnæm þvagblaðra, fótaóeirð, kuldanæmi, dauðir fingur (e. Raynaud´s phenomenon), dofi í útlimum, bjúgur, kraftminnkun, úthaldsleysi, minnisleysi, einbeitingarskortur og depurð.

 

Allt þetta get ég skrifað undir. Og allt þetta hef ég upplifað reglulega. Eiginlega er ég að upplifa allt þetta núna, nema e.t.v. ristildæmið, sem ég hef verið laus við í sl. 2-3 vikur.

Ég greindist með þetta fyrir um 10 árum síðan. Fyrst mætti maður fordómum og nánast hlátri: uppasjúkdómur hvað?

En smám saman hefur fólk verið að átta sig á, að þessi sjúkdómur er ekki ímyndun, heldur raunveruleiki lífsins.

Ég fagna þessum vef og vil þakka Sigrúnu Baldursdóttur, sem hefur verið helsti vefagiftarsérfræðingurinn eins lengi og ég man eftir, fyrir að hafa komið þessu í loftið.

 

Athugasemdir

[Birna Dis Vilbertsdóttir (IP-tala skráð) 4.6.2007 kl. 08:09]

Ég er í vefjagigtarhópnum. Þetta getur verið hundleiðinlegur sjúkdómur að bera. Takk fyrir ábendinguna. Vissi ekki af síðunni.

[Helgi Viðar Hilmarsson, 4.6.2007 kl. 19:20]

Sæll Snorri,

Á hverju byggir þessi greining á þessari svokallaðri Vefjagigt?  Lýsingum þolanda á líkamlegu ástandi sínu?  Ég kannast persónulega við margt af þessu sem kemur fram í lýsingunni hér að ofan og hefði ég sjálfsagt getað fengið þennan merkimiða á heilsuvandamál mín hér fyrir nokkrum árum.  Mér finnst svona merkimiðar lítið hjálpa þegar takmarkaður skilningur er á eðli vandans.  Í dag er ég í fínu formi þó ekki sé ég með öllu laus við heilsuvandamál.  Ég tók málin einfaldlega í eigin hendur og mesta breytingin var þegar ég breytti svefnvenjum mínum.  Ég var geispandi allan daginn og gjörsamlega orkulaus.  Ég hélt ég þyrfti meiri svefn, en annað kom á daginn.  Ég var á villigötum í nokkur ár eftir að hafa lesið bók um svefnvandamál sem taldi mér trú um að ég ætti að sofa helst 10 tíma á sólarhring.  Svo kom að því að ég keypti aðra og vandaðri bók þar sem höfundar lögðu til að ég gerði tilraunir með svefntíma og héldi dagbók yfir þær.  Niðurstaðan úr þeim tilraunum var sú að ég þarf sex og hálfan tíma.  Þetta var bylting fyrir mig.  Einn og hálfur til tveir tímar bættust í sólarhringinn hjá mér og ég var vakandi á daginn og nánast alveg hættur að geispa.  Ég legg mig svo venjulega í hálftíma seinnipartinn og er þá alveg góður þangað til ég fer að sofa sem er um ellefuleytið.  Ég vakna svo klukkan hálf sex alla virka daga og stundum um helgar líka.  Að sofa til klukkan sjö er að sofa út hjá mér.  Núna sef ég semsagt hratt og vel í stað áður lengi og illa.

Þetta var nú fyrsta vers og þú getur fengið fleiri ef þú hefur áhuga.