Þetta er eins og ævintýrið með Næturgalann!

Aftur er kominn fuglasöngur í "keisarahöllina"!

Fuglesang boðið í sænsku konungshöllina

Lygamælarnir!

Spurning að beita sama kerfi hér heima, og setja t.d. svoleiðis í hljóðnemann á Alþingi?

 

Skype býður upp á lygamæla

Viltu vera memm?

Jæja, þessi hringekja heldur áfram. Síðustu misserin hafa kratarnir meira eða minna dregið úr, eða hætt, að ráðast á Sjálfstæðisflokkinn fyrir eitt eða annað. Þess í stað hafa árásir einstakra krata á Framsóknarflokkinn aukist með þeim hætti, að halda mætti að þetta sé allt skipulagt, vísast að ofan. Kannski eru kratarnir fúlir Birni Inga og félögum hans yfir að vilja bjarga borginni undan óstjórn vinstri flokkanna, en þetta virðist líka ná til Alþingis, og er jafnvel harðara þar en annars staðar.

Maður hlýtur að leggja málið upp eftirfarandi:

1. Samfylkingin gerir sér grein fyrir, að Sjálfstæðisflokkurinn hefur staðið sig svo afburða vel við stjórn ríkisins, að erfitt er að finna þar eitthvað til að nöldra yfir...og þegar kratarnir hnýta hálf skömmustulega í sjálfstæðismenn, virðist það vera til að fullnægja formsatriðum -- jú, stjórnarandstaðan á að gagnrýna stjórnina, það er hlutverk hennar. 

2. Samfylkingin telur líklegt, að eftir næstu kosningar verði erfitt að mynda starfhæfa ríkisstjórn án Sjálfstæðisflokksins, t.d. væri fjögurra flokka stjórn ekki vænleg til árangurs. Kratarnir sjá því í hendi sér, að vænlegast er, að ná saman við sjálfstæðismenn. Og af þeim sökum hafa kratarnir kennt framsóknarmönnum um allt, sem þeir telja að aflaga hafi farið á síðustu árum. Jafnframt segja þeir við sjálfstæðisflokkinn: "Viltu vera memm...?"

En frekar er þetta nú lúalegt, finnst manni, að leggja Framsóknarflokkinn í einelti með þessum hætti. Ég segi bara eins og ónefndur karakter: "Mmmmmmaður áttar sig nú ekki á þessu. Skítalykt af málinu." Ætli hún komi af því klósetti, sem fylgir með hér að ofan?

 

Meistaradeildin í knattspyrnu -- 16 liða úrslit.

 

Porto v Chelsea
Celtic v Milan
PSV Eindhoven v Arsenal
Lille v Manchester United
Roma v Lyon
Barcelona v Liverpool
Real Madrid v Bayern Munich
Internazionale v Valencia

Liðin sem komast áfram verða: Chelsea, Milan, Arsenal, Man Utd, Lyon, Barcelona, Bayern og Valencia. Ástæður:

1. Porto-Chelsea. Móri snýr heim með yfirburðalið í farteskinu. Lítil hætta hér.
2. Celtic-Milan. Celtic er sennilega eina liðið þarna, sem ekki myndi vinna Milan, eins og Ítalarnir eru að spila um þessar mundir, já og hugsanlega Liverpool??!!
3. PSV-Arsenal. Arsenal einfaldlega betra lið, en ekki má vanmeta hina fjölþjóðasveitina
4. Lille-Man Utd: Lille eru seigir, en ég held að gamli refurinn landi þessu. Man Utd vinnur.
5. Roma-Lyon: Roma er með mjög gott lið, en ég held að Lyon sé einfaldlega sterkara. Úrslitin gætu þó farið á báða vegu.
6. Barcelona-Liverpool: segir sig sjálft! Það er ekki nóg að vera góðir í vítakeppni.
7. Real-Bayern: Realmenn eru flöktandi og munu brotna á þýska stálinu, sem þó er með veikasta móti núna. Þessi leikur er sennilega sá mest spennandi og ófyrirsjáanlegur, fyrirfram séð.
8. Inter-Valencia: Inter í rokna stuði í ofurskussadeildinni, enda með frábært lið og breiðan hóp. En varnarliðið Valencia, með David Villa frammi, mun komast áfram með marki skoruðu á útivelli.

Ég verð að segja að ég er ánægður með dráttinn, fyrir hönd okkar Arsenal manna. Helst hefði ég viljað frá Celtic, úr því við gátum ekki fengið Liverpool (ensk lið mega ekki mætast innbyrðis strax, ekki frekar en t.d. spænsk). Þessi tvö lið eru þau áberandi slökust í þessum 16 liða úrslitum, hugsanlega ásamt Lille og PSV, sem við Arsenal menn mætum.

Milton Berle -- konungur háðfuglana

Ég var að stofna áðan nýjan "flokk" hér á blogginu mínu, MILTON BERLE. Ástæðan er, að mig langar til að deila hér einstaka sinnum, eða eins og ég nenni, nokkrum af bröndurum eða athugasemdum þessa konungs háðfuglana. Það merkilega er, að þegar maður les þetta frá síðu til síðu sér maður, að hundruðir brandara, sem maður hefur áður heyrt í einhverju samhengi, eiga rætur sína að rekja til Berle, sem annað hvort samdi þá sjálfur, keypti þá frá öðrum, eða hugsanlega stal þeim frá einhverjum óþekktum, lagfærði og gerði fræga. Ég veit annars lítið um þau mál.

Þegar ég bjó í stór-Washington DC 1998 labbaði ég einu sinni sem oftar niður á Dupont Circle. Í einni af slíkum ferðum gekk ég inn í bókabúð þar sem ég sá safnrit með nokkrum af bröndurum Berles: "Private Joke File". Það er úr þessari bók sem ég ætla að lauma nokkrum völdum bröndurum um ákveðin málefni. Margir þessara brandara skiljast illa á íslensku og þá mun ég annað hvort sleppa þeim, eða birta á ensku. Annars reyni ég að þýða það, sem hægt er, og jafnvel snúa þeim upp á menn eða málefni.

ALDUR

1. Þú ert orðinn gamall þegar þú manst þá tíma, þegar maður stakk útvarpinu í samband við innstunguna, ekki tannburstanum.

2. Þú ert orðinn gamall þegar þú þreytist við að hringja langlínusamtöl.

3. Þú ert orðinn gamall þegar þú tekur meiri tíma í að lesa matseðilinn en horfa á gengilbeinuna.

4. Lífið er ósanngjarnt. Hinir ungu vita ekki hvað skal gera, en þeir eldri geta ekki gert það sem þeir vita.

5. Þú ert orðinn gamall þegar þú verður hrifinn af konu fyrir það eitt, að ná þremur tebollum úr einum tepoka.

6. Þú ert orðinn gamall þegar þú átt í erfiðleikum með að muna þrjú atriði: nöfn, andlit....og ég man ekki hvað það þriðja var.

7. Þú ert orðinn gamall þegar hárkollan er orðin grá.

8. Þú ert orðinn gamall, þegar þú nærð loksins að lesa konur eins og bók, en bókasafnskortið er löngu útrunnið.

9. Þú ert orðinn gamall þegar þú manst þá tíð, þegar það tók styttri tíma að fljúgja til Kaupmannahafnar, en að komast heiman frá þér og upp í flugvélina.

10.Þú ert orðinn gamall þegar þig verkjar í allan líkamann, nema þá staði sem virka ekki lengur.

11. Þú ert orðinn gamall, þegar konan sem daðrar við þig í bíóinu langar í poppkornið þitt.

12. Þú ert orðinn gamall, þegar þú þykist vera 20 árum eldri, svo fólk geti hrósað þér fyrir að vera unglegur.

13. Þú ert orðinn gamall, þegar þú ert hættur að fara á "deit" með konum á þínum aldri...af því þær eru allar látnar.

14. Þú ert orðinn gamall þegar þú átt ekki einn einasta óvin í öllum heiminum -- enda dauðir fyrir löngu.

15. Þú ert orðinn gamall þegar þú virðist vera föðurímynd fjölda kvenna í miðbænum; þær eru alltaf að biðja þig um pening.

Reyndu Fatah menn að myrða Haniyeh?

 

Það er ekki nákvæmlega ljóst hvenær Ismail Haniyeh fæddist, en talið er að það hafi verið á Gasa-ströndinni 1955 (segir reyndar ranglega 1963 í Wikipediu), sem þá tilheyrði Egyptalandi. Hann lauk námi í arabískum bókmenntum við Íslamska háskólann í Gasa 1987, þar sem hann hafði tekið þátt í stúdentahreyfingum “íslamista”, að því að talið er. Hann var handtekinn 1989 og þremur árum síðar var hann fluttur til Líbanon, ásamt um 400 öðrum Hamas-liðum, en fékk að snúa aftur nokkru síðar. Hóf hann þá störf við Íslamska háskólann og varð um leið foringi stúdentasamtaka Hamas.

Haniyeh taldi, eins og Hamas-liðar almennt, að málamiðlanir við Ísrael kæmu ekki til greina. Samningar, eins og þeir sem Fatah, undir stjórn Arafats, væru að laumast til að gera, kæmu ekki til greina. Þar var hann undir áhrifum Sheikh Yassins, andlegs leiðtoga Hamas, en Yassin hafði sjálfur numið við fætur foringja Múslimska bræðralagsins í Egyptalandi, en boðar, að koma skuli íslamskri stjórn á hvarvetna, fyrst og fremst í hinum íslamska heimi og breiða hana síðan út. Íslam skiptir heiminum í tvennt; annars vegar heimur íslams (dar al islam, sem nær yfir öll þau svæði þar sem íslam hefur einhvern tíma ráðið) og síðan heimur stríðs (dar al harb, öll önnur lönd). Ísrael væri því staðsett á svæði dar al islam og væri múslimum því óheimilt, að samþykkja tilverurétt þess. Þetta er ein grundvallarkenning Hamas-samtakanna enn í dag.Ismail Haniyeh og aðrir Hamas-liðar geta því ómögulega, trúar- og stjórnmálaskoðana sinna vegna, samþykkt tilverurétt Ísrael. Því muni friður ekki komast á fyrir botni Miðjarðarhafs fyrr en Ísrael hefði verið þurrkað út af kortinu. Haniyeh taldi jafnframt, að besta leiðin til að andæfa Ísrael væri með tafarlausri vopnbeitingu og ku hafa tekið þátt í að skipuleggja árásir á almenna borgara þar í landi, sér í lagi með sprengingum í strætisvögnum. Fyrir sjálfsmorðs á strætisvagn í Jerúsalem 2003 reyndu Ísraelar að ráða hann af dögum, þegar herþota IAF skaut flugskeyti að húsi í Gasa, þar sem hann hafði verið staddur í, ásamt andlegum leiðtoga Hamas, Yassin, og sprengjusérfræðingnum Mohammed Deif. Þeir sluppu allir án verulegra skaða, en Haniyeh særðist lítillega á hendi.Hamas hafði jafnan ekki tekið þátt í þingkosningum, en þegar Yasser Arafat lést, tóku hugmyndir þess lútandi að koma fram meðal æðstu foringja Hamas. Haniyeh hafði þá verið skrifstofustjóri Yassins, en við dauða foringjans 2004 tóku völd hans að eflast. Hann mælti allra manna harðast fyrir því, í innsta hring Hamas, að taka nú þátt í kosningum og var settur í efsta sæti Hamas-listans, bæði í sveitastjórnarkosningum í Gasa og þingkosningunum. Þar vann Hamas stórsigur og túlkaði Haniyeh þau úrslit þannig, að meiri hluti Palestínumanna væri fylgjandi árásum á Ísrael; en væri andvígur hófsamari stefnu og málamiðlunum Fatah-hreyfingarinnar. Hann tók þó ekki með í reikninginn, að stór hluti velgengni Hamas má þakka því, að samtökin ráku skóla og fjármögnuðu að mestu leyti það litla velferðarkerfi, sem þó var við lýði á heimastjórnarsvæðunum, meðan foringjar Fatah voru alræmdir fyrir spillingu og stálu oft hluta þeirra styrkja, sem Palestínumenn fengu frá útlöndum og notuðu í eigin þágu, eða til að fjármagna einkasveitir sínar.En þrátt fyrir allt er Haniyeh, sem varð forsætisráðherra í Hamas-stjórninni í ársbyrjun 2006, um þessar mundir meðal hófsömustu leiðtoga Hamas og hefur m.a. reynt að semja við Fatah um þjóðstjórn og hefur verið tilbúinn að ræða um ýmsar tilslakanir tímabundið, þó án þess að falla frá endanlegum kröfum Hamas um eyðingu Ísraels. Hann var erlendis í fjársöfnunarleiðangri nú í vikunni, þegar byssumenn, sem taldir voru tengjast Hamas, myrtu þrjú börn eins leiðtoga Fatah, en sá maður hafði haft umsjón með tilraunum Arafat-stjórnarinnar til að halda Hamas niðri, jafnvel með því að leka upplýsingum til Mossad, ísraelsku leyniþjónstunnar (að því að sumir hafa talið líklegt, en auðvitað ekki getað sannað). Í framhaldi af því kom til skotbardaga við Rafah í gær, þegar Haniyeh sneri heim frá Egyptalandi, þegar Hamas-liðar höfðu ráðist fram með skothríð í landamærastöðinni þar, en Fatah-liðar svarað og m.a. skotið á bílalest Hanieyhs.

Sjálfur hef ég komið á þessa landamærastöð og ef ég man rétt, er þar lítið um skjól. Bílalestin hefur því verið auðvelt skotmark Fatah. En spurningin er; voru Fatah liðar að hefna fyrir barnamorðin í vikunni, eða er þetta aðeins hluti af valdabaráttu þessara tveggja fylkinga, nú þegar Abbas forseti, leiðtogi Fatah, hefur lýst yfir vilja til að halda nýjar kosningar meðal Palestínumanna?

Persónulega tel ég, að forysta Fatah hafi ekki staðið að baki þessari skotárás á Haniyeh. Slíkt hefði verið alvarleg mistök. En líklegra þykir mér, að einhverjir undirforingjar í Fatah hafi átt þar hlut að máli, eða þá að þessir landamæraverðir, sem voru víst hliðhollir Fatah, hafi ákveðið að taka málin í sínar hendur, í fyrsta lagi vegna barnamorðanna um daginn og einnig vegna þess, að Hamas hafi með ofbeldi ruðst inn á landamærastöðina og hafið skothríð. En annars er ekki gott að segja, hvaða ástæður þarna hafi staðið að baki.

 

Hamas segja að reynt hafi verið að myrða Haniyeh